Í ljósi þess að Landsmóti Hestamanna hefur verið frestað, hefur verið ákveðið að færa sölusýningu sem halda átti vikuna eftir Landsmót, fram á helgina á undan, eða 3-4 júlí 2010.  Bryddað verður uppá nýjungum á þessari sýningu þar sem hægt verður að mæta með tryppi og folöld sem rekin verða til í höllinni, auk þess sem tamin hross verða sýnd ýmist á vellinum ef veður leifir, eða inní reiðhöll. 

Einnig er áhugi á að halda lítið mót fyrir þau hross sem eru heilbrigð af pestinni en það verður ákveðið síðar.

Frekari upplýsingar um sýninguna koma á næstu dögum.

Þrátt fyrir hestapestina er ekki hægt að sjá mikinn slappleika í folaldshryssunum sem hlaupa um bakkana ungar í anda!  Óðsdóttirin Blika frá Bakkakoti á ekki von á sér fyrr en seint í sumar og lét sér ekki muna um að taka sprettinn ásamt reyndar flestum öðrum hryssum, sem var kannski helst hægt að líkja við hóp af beljum sem hleypt er út á vorin þrátt fyrir að hafa haft bakkana í c.a. mánuð útaf fyrir sig.  En vorið er skemmtilegasti tíminn og það er sérkennilegt að hafa varla farið í reiðbuxur í heilan mánuð þegar maður er vanur að vera að spyrna úr hófum á þessum tíma.

Þá er fyrsta folaldið fætt á Borg en það var hún Föl frá Hrafnkelsstöðum sem kastaði fyrst, moldóttri hryssu undan Þyt frá Neðra-Seli.  Föl er í eigu Janne Teksle í Noregi, en Föl er undan 1. verðlauna hestinum Hæring frá Litla-Kambi og er einungis 4 vetra gömul.

Á þessum árstíma er sala til útlanda ekki mjög mikil, en þó helst í ungum hryssum sem fólk hefur áhuga á að halda undir topp stóðhesta í sumar og flytja erlendis í haust.